Новая дата першага ўпамінання пра Вілейку зацверджаная 25 кастрычніка на сесіі раённага савета дэпутатаў. Афіцыйная дата, прынятая ў чацвер на сесіі, – 16 лістапада 1460 года. Да гэтага афіцыйным годам першага ўпамінання лічыўся 1599.



“Вось так і атрымліваецца, што ў 1999-м мы адзначалі 400-годдзе Вілейкі, а цяпер, праз тры гады, адзначым 550-годдзе горада, – сказаў у інтэрв’ю “РГ” краязнаўца Анатоль Рогач, – крочылі ў гісторыю нашага краю яшчэ на 139 гадоў назад”.





Па словах Анатоля Рогача, які выступіў на сесіі, дэпутаты аднагалосна прагаласавалі за новую дату. Краязнаўца расказаў нашаму выданню, што знайшоў дату 16 лістапада 1460 года ў адным з польскіх гістарычных дакументаў “Кодэкс дыпламатычны катэдры і дыяцэзіі Віленскай". У гэтым дакуменце згадвалася, што ў Копным судзе, судзе па ўстанаўленні зямельных межаў, удзельнічалі трое куранчан. Сённяшняя Вілейка тады называлася Каралеўскі Куранец.





Анатоль Рогач адзначае: знайшоў гэтыя звесткі яшчэ гадоў пяць таму, і, нягледзячы на тое, што афіцыйна новая дата ўпамінання не зацвярджалася, ужо тады з усіх знакаў на ўездзе ў горад знікла дата “1599”. “I я, і іншыя краязнаўцы ўвесь гэты час шукалі і дагэтуль спрабуем знайсці даты яшчэ больш ранняга ўпамінання пра Вілейку, але пакуль безвынікова”, – сказаў Анатоль Рогач.



rgazeta.org

Праглядаў: 342