Вялейскі маладзёжны тэатр "Паехалі", сумесна з народным тэатрам, паставілі п'есу "Мікіта, Баба, Зоська, Чорт, а можа й наадварот". Прэм'ера адбылася ў Вялейскім Палацы Культуры, 28 сакавіка, прымеркаваная да Міжнароднага дня тэатра.

    Класічныя, ужо вядомыя заўзятым тэатралам творы беларускіх пісьменнікаў былі смела і арыгінальна ўсучаснены і звязаны ў адзін сюжэт рэжысёрам-пастаноўшчыкам Леанідам Курцам і яскрава адыграны ўжо вядомымі вялейскай сцэне акторамі. Атрымалася смачнае асарці сюжэтных ліній, характараў, знешніх вобразаў, сучаснасці і мінуўшчыны, вясковага ды гарадскога.

    Гэтак, Мікітаў лапаць ("трасца яму ў бок!" :)) ператварыўся ў атопак-адыдас-красовак. А маці Зоські марыла пра зяця, як у бразільскім сэрыяле, багатага і каб яе (цьфу, Зоську) вазіў на ўсялякія Канары. Чорт жа стаўся такім гламурна-сэнтыментальным персанажам, які найграваў на фагоце лірычныя мелодыі, сумуючы па радзіме - Пеклу. У яго ўрэшце закахалася адна з гераінь...

    Асобнай цікавосткай былі выхады трох юнакоў і дзяўчыны ў якасці адмысловых канфэрансье, якія і смяшылі, і, канешне, нітавалі сюжэтную лінію пра галоўнага героя Мікіту і ягоныя сны.

    Вось такая была прэм'ера. І калі надарыцца вам пабачыць афішу пастаноўкі яшчэ раз - не прапусціце: вечар добрага, вясёлага настрою гарантаваны.





Ролі выконвалі: А. Пуцэйка, Л.Кіцікава, М.Заяц, А.Дударчык, А.Занкавіч, К.Святоха, А.Сівец, М.Дзямідаў.
Рэжысер-пастаноўшчык: Леанід Курц.

Праглядаў: 391