Панэльная агароджа вакол будынка раённага аддзела ўнутраных спраў павінна быць размаляваная графіці. Падрыхтоўку да такой незвычайнай аперацыі пачала вілейская міліцыя. Агароджу павінны размаляваць школьнікі.

Размалёўка агароджы будзе праходзіць у рамках акцыі "Мая міліцыя". Гэта павінна стаць своеасаблівым крокам да збліжэння праваахоўных органаў з народам, гэты крок   лішні  раз   пацвердзіць, што міліцыянеры — такія самыя людзі, як усе, і што ім таксама ўласцівая любоў да цудоўнага.

"Мы рыхтуемся да правядзення гэтага мерапрыемства і не баімся, што такая сур'ёзная установа, як райаддзел міліцыі, можа быць пафарбаваная ў "вясёленькія" колеры. Галоўнае, каб гэта было прыгожа, эстэтычна і з густам", — адзначыў 16 красавіка ў інтэрв'ю "РГ" намеснік начальніка Вілейскага РАУС, кіраўнік групы кадраў Андрэй Дударчык. Паводле яго слоў, ідэя размаляваць агароджу вакол райаддзела існавала даўно, але яе рэалізацыя па розных прычынах адкладвалася. Падчас папярэдняй падрыхтоўкі да акцыі былі нават распрацаваныя эскізы малюнкаў. Плануецца, што менавіта з іх будуць зробленыя першыя работы. Намеснік начальніка РАУС спадзяецца, што з'явяцца гэтыя работы ужо у маі.
За дапамогай і падтрымкай, у тым ліку матэрыяльнай, на пачатку наступнага тыдня Андрэй Дударчык збіраецца звярнуцца ў аддзел па рабоце з моладдзю райвыканкама.

"Па школах трэба кінуць кліч шукаць таленавітых графітчыкаў, якія з энтузіязмам возьмуцца за справу, - кажа Андрэй Дударчык, — удакладніць, ці гатовыя яны маляваць па тых эскізах, якія ужо ёсць".
"Вучэбным палігонам" для першых работ стане ўнутраная частка агароджы. Калі на ей з'явяцца малюнкі графіці, яны будуць бачныя з боку вуліцы 1 Мая і вуліцы Молакава. А калі будуць распрацаваныя новыя добрыя эскізы, вытрыманыя ў духу міліцэйскай тэматыкі, будуць глядзецца прыгожа   і   эстэтычна, кіраўніцтва РАУС адразу дазволіць маляваць і з вонкавага боку агароджы.

"На жаль, добрых, таленавітых графітчыкаў у нас няшмат, больш так званых "бамбістаў", якія нейкімі закавыкамі пішуць на сценах лозунгі. Гэта зусім іншае. Графіці ж — элемент мастацтва. I нам хочацца, каб работы былі вытрыманыя менавіта ў стылі мастацтва", - сказаў у інтэрв'ю нашаму выданню Андрэй Дударчык.


Сяргей Зянько
Рэгіянальная газета