Занепакоенае інцыдэнтам з гэтым маладым мінчуком кіраўніцтва ЕГУ ініцыявала 22 красавіка экстранную сустрэчу са студэнтамі. Падчас яе прарэктар ЕГУ Уладзімір Дунаеў заявіў, што запэўніванні адміністрацыі універсітэта ў тым, што гэты выпадак з’яўляецца выключным, не выглядаюць пераканаўчымі. І таму зараз студэнтам і выкладчыкам універсітэта трэба сур’ёзна працаваць над тым, каб пераканаць тых, хто займаецца расследаваннем злачынства, а таксама донараў і партнёраў навучальнай установы у тым, што затрыманне аднаго з былых студэнтаў ЕГУ — на самой справе з’ява нетыповая.

Адміністрацыя універсітэта неаднаразова падкрэслівала, што затрыманы малады чалавек у дадзены момант ужо не з’яўляецца студэнтам ЕГУ. Прарэктар Дунаеў паведаміў, што гэты студэнт быў адлічаны за непаспяховасць загадам яшчэ ад 27 сакавіка.

Адным з наступстваў для студэнтаў, якія будуць замешаныя ў справах з наркотыкамі, Уладзімір Дунаеў назваў выключэнне з універсітэту і пазбаўленне дазволу на жыхарства ў Літве. У горшым выпадку злачынцаў чакае крымінальная адказнасць.

Уладзімір Дунаеў папярэдзіў студэнтаў пра верагоднасць прадпрыняцця літоўскімі спецслужбамі рэйдаў з мэтай выяўлення наркотыкаў у студэнцкіх інтэрнатах. Адміністрацыя універсітэту параіла студэнтам падрыхтавацца да таго, што супрацоўнікі як літоўскай, так і беларускай мытні, верагодна, будуць звяртаць на іх вялікую ўвагу. Мажлівыя нават асабістыя надгляды. Таму універсітэцкія праўнікі далі навучэнцам парады, як паводзіць сябе падчас перасячэньня дзяржаўнай мяжы.

Сяржук Гаўрыленка, Радыё Рацыя